الفصل الأول 1 بقلم هدير محمد
انا اتجوزت واحد معرفهوش بسبب أهلي بس بعد ما اتجوزنا عرفت كمان ان هو اتجوزني بسبب أبوه
يعني احنا الإتنين بسبب اهلنا حصل كده
المهم بعد ما اتجوزنا هو في أوضة لحاله وانا في أوضة ومش بنتكلم مع بعض ابدا
انا عليا مصالح البيت وهو عليه شغله اللي بيروحه (أنا اسمي أيلين و هو إسمه سليم)
قعدنا كده أخوات اكتر من 8 شهور !!!!
و قدام الناس كلها إحنا أحلى أتنين في الدنيا لكن في الحقيقة لا طبعا
هو من النوع اللي مش بيعمل مشاكل و انا كذلك يعني احنا الإتنين مختصرين بعض
البيت طول فترة جوازنا كله هدوء مفيش خناق ولا مشاكل ابدا ،،،،،،،،،،، بس الهدوء ده طبعا مش هيقعد لطول العمر يعني
جه اليوم اللي قلب الهدوء ده رأس على عقب حيث كانت الساعة 3 الفجر كنت نايمة عادي في أوضتي
صحيت فجأة بسبب إني كنت دايخة و حاسة أني عايزة أرجع كل اللي في بطني و جسمي كله سخن
خرجت من الأوضة طيرت على الحمام و فضلت
ارجع كذا مرة و لما خرجت من الحمام لقيته خارج من اوضته و لاحظ أن فيا حاجة !!!
=إنتي كويسة ؟
_اها انا كو….كويسة
=متأكدة ؟
_اه متأكدة
=طيب
مشي من قدامي نظراته بتقول أنه شاكك أن فيا حاجة بس خبيت عليه لغاية ما اعرف إيه اللي بيحصلي ده
عدى يومين و كل يوم اصحى بنفس التعب صاحية دايخة و عاوزة اتخانق مع حد معرفش ليه و كل شوية ارجع و معظم الأكل بقيت مش بطيق ريحته وبحس أن كل أكله تقيلة عليا
اتصلت بصحبتي ممكن تقولي على دواء كويس يحل كل حاجة ……
_ يا حبيبة انا دايخة جدا ومش على بعضي و من إمبارح شغالة ترجيع
*اللللللله إنتي حامل
_ حامل ايه يا هبلة لا مستحيل
*لا حامل ده كلها أعراض حمل ألف مبروك يا روحي
_لا مش حامل انا متأكدة
*إنتي متجوزة بقالك فترة أكيد حامل
_لا لا ممكن يكونوا شوية تعب او أخدت برد لأني بسيب البلكونة مفتوحة لما أنام
*عليا الطلاق حامل انا جاتلي نفس الأعراض لما كنت حامل في بنتي رنا
_سيبك من كده انا عايزة حاجة تخفف الدوخة اللي حاسة بيها دي و الترجيع ده لأني زهقت
*اشربي حاجات
سخنة و مع الوقت هتبقي كويسة لكن الترجيع ده مستمر طول فترة الحمل
_يا ربي إنتي عايزة تطلعيني حامل بأي شكل من الأشكال و خلاص !!!
*روحي اكشفي و هتقولي أني قولتلك أنك حامل فعلا
_طب غوري يلا سلام
قفلت معاها فضلت أفكر في كلامها فعلا اللي بيحصلي ده كلها أعراض الحمل بس انا إزاي حامل ؟!!!!!
دي غبية متعرفش حاجة ،،،،،،،،، فجأة باب أوضتي خبط وطلع سليم كان لابس لشغله و لما دخل فضل يبصلي عشان شكلي واضح جدا أني تعبانة
=ده مصروف البيت ابقى خلي البواب يجيبلك أي حاجة إنتي عيزاها عشان احتمال أتأخر النهاردة
_طيب تمام (اخدت منه الفلوس)
و راح عند الباب يخرج وقبل ما يخرج لف و بصلي و قال
= إنتي فيكي حاجة ؟
رديت بتوتر
_لا لا مفيش انا كويسة
=من يومين او أكتر و إنتي تعبانة بالشكل ده ليه ؟
_اخدت شوية برد نسيت البلكونة مفتوحة
=في جوه التلاجة دواء للبرد ابقى اعملي مشروب سخن و اشربي الدواء بعدها
_حاضر
و مشي و برضو ملامح وشه بتقول أنه مش مصدق اللي بقوله ده ابدا و انه بيجاريني في الكلام مش أكتر
و عملت زي ما قال سليم شربت حاجات سخنة و أخدت دواء البرد و قعدت بالليل كده اتفرج على التليفزيون شوية
و كنت بفكر في كلام صحبتي جامد ممكن أطلع حامل بس ازاي سليم مجاش ناحيتي وكل يوم لما بنام بقفل باب أوضتي بالمفتاح !!!
اكيد في حاجة غلط شوية تعب و هيروحوا لحالهم …..
*في شغل سليم*
^ياولا خد الورق ده
^يا سليم ؟!!!
^يا بني بنادي عليك ما ترد
^يا سلييييييييييم
=ايه فيه ايه ؟
^بنادي عليك من بدري
=معلش سرحت شوية يا قاسم
^طب امضي على شوية الملفات دول و بعدها أرجع بيتك ارتاح ليك أكتر من 12 ساعة شغال
=سيبهم بعيد مليش نفس أقرأ و لا أمضي على أي حاجة
^طب أهم هنا (حطهم على المكتب) انا مروح عايز حاجة ؟
=لا بس عايز احكي معاك في حاجة
^اتفضل
=بما أنك صديقي من زمان و بعدين انت عارف انا اتجوزت ازاي و عارف كل حاجة
^ اها
=و أنت عارف كمان أن أيلين مش بحبها و تعاملي معاها محدود جدا
^ سليم ادخل في الموضوع على طول
= بصراحة كده انا ملاحظ على أيلين من تلات أيام او أكتر أنها مش مظبوطة
^ اللي هو ازاي ؟
=يعني طول الوقت بترجع و دايخة وساعات بتقع و لما أجيب أكل مثلا و تشم ريحته و تقولي أبعد عني الكيس ده مع أن الأكل ده كويس
=و حاجات تانية كتير مش عارف أحدد ده ايه بالظبط هل هي تعبانة ولا ايه
^وديها للدكتور و يقولك فيها ايه
=بص انا شاكك أنها حامل
^حامل إزاي يا بني مش انت بتقول من يوم الفرح هي في أوضة و انت في أوضة ؟!!!
= ايوة حصل أنا مقربتش عليها ، بس في نفس الوقت معرفهاش ولا اعرف حاجة عن ماضيها و خايف لتكون غلطت مع حد وبتغفلني
^طب حوش الهبل ده من دماغك مراتك مش حامل يعني أنت لو صحيت دايخ و بترجع هقولك أنك حامل
^أبوك يوم لما جوزهالك عشان تعقل وتتحمل المسؤولية جبلك بنت ناس هو عارفها وعارف عليتها كلها مش جبلك وحدة من الشارع
= ما انا عارف أنها كويسة بس لما بسألها بحسها بتكذب عليا
^مش يمكن هي بتكذب عليك عشان عمرها ما حست أنك سند ليها و طول الوقت بعيد عنها ومش بتكلمها ؟
= تفتكر كده ؟
^أنت روح أرجع بيتك دلوقتي و حاول تفتح معاها مواضيع مش يمكن تقولك هي تعبانة بأيه
=أنت صح هحاول
^يلا انا ماشي
=سلام يا حبيبي
قاسم مشي و بعد نص ساعة سليم رجع بيته ………..
سليم أول ما فتح باب الشقة لقي أيلين نايمة في الصالة
دخل اوضته و غير هدومه و لما خرج افتكر كلام قاسم ،،،،،،، راح على المطبخ عملها أكلة خفيفة و مشروب سخن
راح عندها بالأكل و صحاني من النوم ،،،،، لما فتحت عيني و لقيته قدامي قومت على طول
و قولت في سري _ جاي عندي ليه ده انا نمت ازاي في الصالة انا هروح على أوضتي
جيت امشي ف مسك ايدي وقالي
= اقعدي
_ انا داخلة أنام اعملك العشا ؟
= لا أكلت
_ اومال عايزني في ايه ؟
=عايزك إنتي تاكلي عملت أكلة خفيفة على معدتك شوربة فراخ اشربيها حلوة للبرد
استغربت من كده ده أول مرة يعملي حاجة بس قولت خلاص أكل كده كده انا جعانة و الشوربة خفيفة على معدتي
و بدأت أكل وهو قاعد جمبي طول الوقت بيبصلي كأنه مستني حاجة تحصل
خلصت أكل و قولت
_ انا داخلة أنام
=مش هتشربي الأعشاب اللي عملتها
_ مش لازم ابقى اخد الدواء
أصر أني اشربها ف رضيت اشربها لكن أول ما مسكت الكوباية وشميت ريحتها حسيت بتقل من جوايا و مستحملتش رحيتها
و حطيت ايدي على بوقي و جريت
على الحمام أرجع ،،،،، رجعت كل اللي أكلته و هو جه ورايا على الحمام وشافني و انا برجع
ولما خصلت حسيت بوجع شديد في بطني و روحت على أوضتي و وهو دخل قالي
= اتصلك بالدكتورة تيجي هنا ؟
_لا لا مش لازم انا كويسة
=كل مرة بتقولي كويسة حالتك بتسوء يوم عن يوم
_ انا كويسة مفيش حاجة
=طب قولي مالك تعبانة ازاي ؟
_مفيش والله
=خلاص هتصل على الدكتورة
_ لا متتصلش
بصلي بستغراب شديد
_قصدي مش لازم تتعبها في الصبح هبقى أحسن انا هنام دلوقتي
=إنتي خايفة ليه من الدكتورة ؟
_مش خايفة بس ……(وقعت على الأرض اغمى عليا)
=أيلين!!!!!!
سليم حطني على السرير برضو جابلي الدكتورة كنت فاقدة الوعي تماماً
=هي مالها يا دكتورة ؟
=هي كويسة صح ؟
-اه كويسة الحمد لله
=طب مالها هي طول الوقت دايخة وبترجع ومعظم الأكل بتحسه تقيل عليها ده سببه ايه ولا هي اخدت برد شديد في معدتها ؟
– لا مش حكاية برد
= اومال ايه ؟
-مبروك المدام حامل
سليم اتفاجىء من قالته الدكتورة وفضل يضحك بسخرية
= حامل ازاي لامواخدة ؟!!!!!
– حامل زي الناس انا كشفت عليها و هي فعلا طلعت حامل
=إنتي بتكذبي أيلين مش حامل
-انت بتكذبني ليه كل الأعراض اللي عندها دي بتثبت انها حامل ودي أعراض طبيعية هتفضل مستمرة طوال فترة الحمل
=متسحيل اللي بتقوليه ده حامل إزاي و من مين ؟؟؟
– مش حكايتي دي ، لو مش مصدق روح اعرضها على أي دكتور تاني هيقولك نفس اللي قولته
-انتبه لصحتها و لأكلها كويس عشان التعب ميزيدش عليها ويأثر على الطفل ، استأذن بقا
مشيت الدكتورة أما سليم دماغه هتنفجر
=أيلين حامل من مين انا ملمستهاش ولا قربت منها إبن مين اللي في بطنها ده ؟!!!!!!!
بص على أيلين بغضب شديد
= هقتلك انتي و عشيقك يا ولاد الكل******
يتبع…..
رواية ايلين وسليم الفصل الثاني 2 بقلم هدير محمد
سليم بيلف في الأوضة زي المجنون و مستني أن انا أصحى قعد على الكرسي و بيبص عليا ومستني بس افتح عيني بس
عدت حوالي ساعة و لما صحيت حصل كالتالي :
أول مرة أشوف الغضب الشديد ده عليه و لما شافني أني فوقت ابتسم ابتسامة اصطناعية و قال
=قومتي ليه يا أيلين كملي نوم خليكي على راحتك عشان الطفل يبقى كويس
اتفاجئت من قاله وقولتله
_طفل ايه ؟
=إنتي حامل الف مبروك ان شاء الله تقومي بألف صحة وسلامة
_حامل ازاي ؟؟!!!
=إنتي بتسأليني انا ليه على أساس أن انا أبوه يعني ؟ روحي اسألي اللي جابه و انا مالي هو أنا جيت جمبك مثلا
_انا حامل إزاي أقسم بالله محدش لمسني
جه عندي وقرب مني وشدني من شعري جامد و زعق وقالي
=عايز اعرف هو انا عملتلك ايه عشان تعملي فيا كده ؟!!!
=أبو الطفل يبقى مين انطقي
_ معرفش والله انا معرفش حد غيرك
=لا انا اللي هعرف يعني ، تصدقي ضحكتيني يعني أنتي متعرفيش حد غيري على أساس احنا الإتنين اتولدنا في نفس اللفة هو انا عبيط عشان اصدق كده ؟!!!!
=قمسا بالله لو معرفتش مين أبوه هتقتلك
=للدرجة انا طلعت مغفل عشان تستغلي عدم وجودي في البيت تروحي تخونيني !!!!!
_والله معرفش انا حامل إزاي ؟
=متعرفيش يعني انا من أول ما اتجوزتك مقربتش عليكي و دلوقتي حامل ايه الطفل ده يعني نزلتيه من على النت مثلا
=بقولك قولي مين أبوه حالا بدل ما افضحك فضحية محدش هينساها
=جبتيه كام مرة هنا و استغليتي أني طول الوقت مش موجود
_مجبتش حد انا بس…..
=متكمليش اوعى تكملي كلام وتقعدي تنكري و تكذبي خلاص انا عرفتك على حقيقتك البشعة
شدني و طلعني في الصالة و فتح الباب و نادى على البواب
=يا أشرف يا أشرف
*نعم يا أستاذ
=تعالى عايزك
*حاضر
جه أشرف و سليم قاله
=هسألك سؤال وياريت تجاوبني بصراحة بدل ما هزعلك
*اتفضل يا أستاذ
=أثناء غيابي هل المدام جالها أي حد غريب عليك
*أيوة انا على ما اتذكر مرة أنت كنت بره جه واحد سأل عليها و كنت هقوله يمشي لأنك مش موجود بس هي كانت قالتلي أنها تعرفه و دخلته البيت لما
امرتني بكده و قعد حوالي 3 ساعات وبعدها مشي
= الآه ؟!!!!! ما طلعنا حلوين اهو وبنعرف ناس غريبة و كمان بتدخليه بيتي و انا مش موجود !!!
_ده كان أخويا حتى عم أشرف عارف انه هو محمد أخويا
=اخوكي؟؟؟؟؟ ، أشرف اللي جه ده كان أخوها فعلا ولا ايه ؟
*انا فاكر انه واحد غريب مش أخوها لأني عارفه
_انت بتكذب ليه هو انا عملتلك ايه عشان تكذب عليا و على سليم ؟
دخلت الأوضة و فتحت الدولاب و أخدت صورة أخويا و طلعت تاني و حطيت الصورة قدامهم
_مش ده يا عم أشرف هو اللي جه ساعتها اللي هو أخويا
شاف الصورة وقالي
*لا مش هو ده اخوكي ده نفس الشخص الغريب اللي جالك
_يا عم بص كويس والله ده أخويا اللي مسافر أمريكا جه إجازة ساعتها يسلم عليك يا سليم لأنه عمره ما شافك ولا حضر الفرح ولما جه انت كنت بره و دخلته البيت لأنه أخويا مش واحد غريب و مشي لما لقيك اتأخرت عشان معاد الطيارة بتاعته
*انا متأكد أن ده نفس الشخص الغريب اللي
جالك هو هو اللي في الصورة
_متقول الحقيقة انت بتكذب ليه ؟؟؟؟
=خلاص يا أشرف امشي دلوقت
مشي عم أشرف و سليم بصلي و و عليه كمية غضب شديدة
=جبتي عشيقك هنا و قعد 3 ساعات !!! عملتوا ايه ال 3 ساعات دول ؟
_والله أخويا صدقني
=انا مش عارف كمية البجاحة دي جيباها من فين لدرجة أنك قاردة تحطي عينك في عيني بكل الجرأة دي وتنكري وهو ليه قال أنه مش اخوكي !!!
_انا هتصل على أخويا وهو هيقولك بنفسه
جبت تليفوني و عملت مكالمة دولية و التليفون فضل يرن لكن أخويا مردش و اتصلت كمان مرة مردش برضو
_رد و النبي يا محمد
سليم ضحك بسخرية وقالي
=اخوكي مردش اهو عشان إنتي عايزة تستخدميه ك ساتر في خيانتك ليا
_انا مش خاينة……..
فجأة حط ايدي على بوقي و مسك ايدى كأنه هيكسرها و قالي بزعيق
=شششششش اسكتي مش عايز اسمع مبررات كاذبة كلها كفاية كذب بقا ايه متعبتيش من كتر الكذب خلي عندك شوية دم حتى
=و قال ايه أبويا يقولي اتجوزها بتلبس دي خمار دي غلبانة دي ملاك دي مفيش منها تعالي شوف الملاك الجميلة أم خمار أيلين اللي واثق فيها حطت رأسك في الطين و جابت العار لينا كلنا يلا طير من الفرحة بقا
=انا بسبب أن أبويا غصب عليا أني اتجوزك خسرت حبي و رضيت اتجوز وحدة معرفهاش لا وكمان خاينة !!!
= اتجوزت وحدة من اختيار أبويا و في الآخر تبقى حامل من واحد بتحبيه و تغفليني بالطريقة دي
=تعرفي انا اتنازلت عن حبيبتي و رضيت أتجوز وحدة زيك وفي الآخر تعملي كده ؟!!!!
=بس لا انا مش هسكت انا هعرف اجيب حقي منكم انتوا الإتنين متخفيش هدفنك انت وهو مع بعض فى قبر واحد عشان القذارة لازم تبقى مع اللي زيها
=انا بكرهك أقسم بالله عمري ما كرهت حد زيك كده إنتي مش بتقرفي من نفسك ابدا ولا ايه انتي عملتي عـ,ـلاقة محرمة شرعا مع حد لا يمد لك بصلة أثناء ما إنتي مكتوبة على زمتي و فوق كل ده مصممة تنكري ايه معندكيش ذرة دم ابدا ؟!!!
زقني بعيد وفضل يضحك و يعيط في نفس الوقت وقال
=تعرفي الغلط مش عليكي الغلط عليا انا تعرفي ليه ؟
=لأني اتجوزت وحدة قذرة زيك
مشي و رزع الباب وراه و انا مش مصدقة اللي قاله ؟!!!! طعني في شرفي بطريقة بشعة انا متأكدة أن محدش لمسني وسليم قالي كلام صعب محدش يستحمله ابدا
فضلت اعيط و ادعي ربنا كتير و حسيت ان رجلي وجعاني روحت اخدت دواء الأملاح اللي باخده دايما عشان بيخفف وجع رجلي ده لأن عندي زيادة أملاح هديت شوية بس الأعراض لسه مستمرة و فضلت اتصل على سليم لكن مردش اضطريت اتصل على والده
_الو يا عمي ممكن تتصل على سليم ؟
“ليه حصل ايه يا بنتي
_مفيش حاجة بس مش بيرد عليا
“طيب هتصلك عليه
_تمام شكرا
قفلت معاه وبعد شوية اتصل عليا وقالي أنه رن عليه كتير لكن مردش في أخر اقفل تليفونه
ومش عارفة اعمل ايه لازم يعرف أن فيه حاجة غلط و يعرف أن مفيش حد لمسني و إني لسه محافظة على شرفي ومعملتش حاجة تخلي سُمعته تنزل للأرض و قعدت طول الليل مستنياه يرجع
*من الجانب الآخر*
سليم مشي بعربيته و هو مش طايق نفسه
=للدرجة دي أنا غبي !!!!!
=انا عملتلها ايه عشان تعمل فيا كده ؟
=كان ممكن أكلم أي وحدة قدامها بس كنت خايف على مشاعرها لكن هي عملت حاجة فيا متتصدقش
=هي ازاي عايشة كده عادي ده انا لما عرفت حقيقتها قرفت من نفسي اومال هي بتباجح عادي !!!
حس بخنقه جواه فتح تليفونه لقي أيلين و أبوه متصلين عليه كذا مرة
وهو مهتمش خالص و اتصل بصديقه “قاسم”
=قاسم انا محتاجك
^فيه يا سليم الوقت الفجر
=معلش تعالى عايزك هبعتلك العنوان في رسالة
^ماشي تمام هلبس وجاي
و بعد نص ساعة قاسم جه عند سليم و دخل جوه العربية
^حصل ايه خضيتني؟
=زي ما توقعت أيلين حامل فعلا
^ازاي ده ؟!!!
=هحكيلك كل حاجة
(بعد ما حكى له كل حاجة من ألف إلي الياء)
=شوفت انا طلعت مغفل بدرجة مكنتش اتوقعها
^مش ممكن يكون الحمل كاذب ؟
=إزاي يعني؟ الدكتورة كشفت عليها و قالت إنها حامل
^يعني طالما هي مصممة أن مفيش حد قربلها مش ممكن تكون هي صح ؟
=لا مستحيل دي مجرد مبررات ملهاش معنى
^لا ممكن تكون صح أصل اصرارها ده ضدك أكيد وراه حاجة أصل انا سمعت عن الحمل الكاذب كتير و مراتي برضو حصلها حمل كاذب بسبب تشخيص خطأ من الدكتور بس مقولتش أنها بتخوني
=انت مقولتش عشان عرفها و عايش معاها حياة طبيعية إما أيلين انا معرفش عنها حاجة حرفيا
^بص من الاخر بكره تاخدها عند دكتورة تانية و خليها تعمل تحاليل قدامك و ان شاء الله يبقى حمل كاذب ما ساعات الدكاترة بيغلطوا عادي
=أنت شايف كده ؟
^طبعا شايف كده عشان ممكن تكون هي اللي صح
=طب لو طلعت صح فعلا و مجرد حمل كاذب هعمل ايه أنا ؟
^هتعتذرلها طبعا و تصالحها و تخلي عـ,ـلاقتك بيها تقوى وتقرب منها وتعرف حاجات كتيرة عنها
=ماشي هاخدها بكره بنفسي عند دكتورة تانية بس لو طلعت حامل فعلا هقتلها
^استهدى بالله و ربنا يحلها
=و نعم بالله
مشي قاسم و سليم بيفكر فيه كلامه اللي قاله……..
و أخيرا رجع البيت
أول ما فتح باب الشقة لقيني قاعدة مستنياه بس مبصليش ولا أتكلم معايا و رايح يدخل اوضته روحت مسكت ايده وقفته وقولت
_مينفعش اسيبك كده و انا في نظرك وحدة حقيرة و انا اصلا معملتش حاجة
سحب أيده من ايدي وقالي
=و المطلوب ؟
تلقائيا عيطت وقولتله
_انا مستعدة اعملك أي حاجة تثبت أني مش خاينة ومفيش مخلوق قربلي
_انا سيبتك تقول أي كلام في حق شرفي و استحملت و ضغطت على نفسي كتير لكن الدور عليك أنك تسمعني
_انا فعلا لو عملت حاجة غلط هقولك وهتعرف بيها لكن طول ما انت بتعاملني كده وعايز تثبت أني خونتك وخلاص عمري ما هقولك أني خاينة عشان تريح المفاهيم اللي في دماغك و مش هتعرف بذنب انا معملتهوش ياريت تفكر يا سليم
_انت بتسيء لشرفي على كده و أهم حاجة للبنت شرفها و انا مستحيل اسيبك بس تفكر أني خاينة او عملت عـ,ـلاقة
مع حد صدقني انا مش كده خالص مهما كنت بتكرهني لأني سبب مشاكل كتير في حياتك برضو استاهل فرصه منك عشان أوضح كل حاجة
مهتمش لكلامي و مشي بس برضو مسكته من ايده وقفته تاني
_ممكن بس تسمعني و اتكلم بأي كلمة أرجوك سكوتك ده مرة على مرة هيقتلني خليني أقولك أني مهما اختلفنا او اتخانقنا عمري ما كنت هفكر اجيبلك العار او حتى عيني تبص لحد تاني فكر شوية الموضوع بالنسبالي حياة او موت ومستحيل اسيبك تفكر فيا بطريقة وحشة
وقف شوية ساكت و بعدها قالي
=طيب لو إنتي بتقولي الحقيقة مش هتخافي لما أخدك بكره
عند الدكتورة نعمل تحاليل نشوف الحمل ده حقيقي ولا كذب
_طبعا هاجي أخاف من ايه وانا متأكدة من نفسي
=تمام
دخل اوضته و قفل الباب بس انا فرحت أكيد دي إشارة من ربنا عشان سليم يعرف أني مش خاينة و إني لسه بنت
*تاني يوم*
صحيت بدري و لبست و قبل ما يجي سليم يقولي يلا نخرج للدكتورة كنت بقرأ قرأن و بدعي ربنا أنه يعرف الحقيقة
خبط الباب و كان سليم طبعا
=يلا نخرج
_يلا
و ركبنا العربية ………….
و بعد شوية وصلنا المستشفى
و روحنا عند الدكتورة اللي يعرفها و كشفت و عملت تحاليل و مستنين النتيجة
أثناء ما إحنا قاعدين قالي
=لو طلع كلامك صح هتعملي ايه ؟
_هفرح طبعا عشان تعرف أن انا مش بكذب عليك
=أتمنى أن يطلع كلامك حقيقي
_ يارب
“الأستاذة أيلين مصطفى محمد
_ نعم دي أنا
“اتفضلي نتيجة التحليل طلعت
أخدت الورق و بصيت ل سليم وهو بصلي بلفهة و عايز يعرف مكتوب ايه
نظارته وترتني و خفت افتح الورق روحت بكل ذرة ثقة عندى اديته هو الورق
و اخدهم و بصلي و أبتسم و فتح الورق و قرأه و بعد ما قرأ نتيجة التحليل وشه ظهر عليه ريأكشن الاندهاش و بص على الدكتورة وقالها
=ايه ده ؟
“نتيجة التحليل المدام
_هو فيه ايه ؟
“يا أستاذ المدام حامل فعلا اهو كل حاجة بالاثبات قدامك
=حامل ؟!!!!!
يتبع رواية ايلين وسليم الفصل الثالث 3 بقلم هدير محمد
=حامل ؟!!!!!
“أيوة يا أستاذ المدام حامل نتيجة التحليل دي بتثبت مليون في المائة انها حامل
“و لازم ترتاح
سليم بيدوس على أسنانه من كتر الغضب و عايز ينفجر فيا
_يا دكتورة مستحيل ابقى حامل انا …..
سليم قطع كلامي وقالي بنبرة غريبة
= اخرسي متتكلميش و لا كلمة
“هو فيه مشكلة يا أستاذ ؟
ابتسم ابتسامة اصطناعية و قال
=مشكلة ايه لا لا لا ده انا خايف عليها ما هي برضو حامل الكلام الكتير من غير فايدة هيتعبها
“شكلك بتحبها أوي و بتخاف عليها من أقل حاجة ربنا يخليكوا لبعض دايما ياارب
بصلي وقال
=اووماال ده أيلين مراتي و انا بموت فيها لازم أخاف عليها دي حامل
=يلا يا أيلين نرجع البيت يا روحي عشان ترتاحي
قومت وهو مسك ايدي عشان يسندني بس قالي بصوت واطي
= هقتلك و هتشوفي
خوفت منه وقفت في نص المستشفى مش عايزة امشي معاه ف شدني و قالي
=امشي من
غير شوشرة عشان مزعلكيش
و اضطريت امشي و ركبت العربية و قفل باب العربية كويس عشان مهربش
في الطريق قاعد ساكت خاالص و انا مش عارفة أقول ايه
و لما وصلنا البيت فتح باب العربية و قالي
=اتفضلي انزلي
نزلت لكن نظراته ليا كانت بتخوف أوي و فجأة نادى على البواب
=يا أشرف تعالى
جه أشرف و قاله
*نعم يا أستاذ
=عايزك تمشي دلوقت و تقول لكل الرجالة يمشوا كمان مش عايز حد هنا ابدا انا لما اعوز حد فيكم هتصل عليكم
*أوامرك
مشي عم أشرف و سليم قالي
=بصالي كده ليه ما تطلعي فوق !!!
طلعت فوق وهو جه ورايا و لما دخل قفل باب الشقة بالمفتاح
_سليم انت بتعمل ايه ؟
=ولا حاجة يروحي بقفله عشان نبقى على راحتنا
_سليم انا مش حامل محدش لمسني و متأكدة من نفسي
=هو انا قولت غير كده طبعا انا مصدقك
ابتسم بخثب و قلع الجاكت و شمر كوم القميص و راح عند التلاجة فتحها و أخد زجاجة مياه
و فضل يشرب و قالي
=كذبك عطشني ، تفتكري يا أيلين الطفل هيطلع شبهك و لا شبه أبوه ؟
_انا مش بكذب والله بقول الحقيقة
=و التحليل هيكذب ؟
_معرفش بس انا عارفة و متأكدة ان محدش لمسني
ساب زجاجة مياه و قرب مني وقالي
=ما إنتي لو مقولتيش أبوه يبقى مين هدفنك النهاردة
_يا سليم أرجوك صدقني
=لا لا قولتي اصدقك و فعلا صدقتك لكن يا روحي نتيجة التحليل أثبتت أنك حامل يعني عملتي عـ,ـلاقة مع حد و لو معرفتهوش هو مين إنتي اللي هتموتي و مش هتحلقي تفرحي بالطفل
فضلت اعيط و اترجاه أنه يصدقني لكن رفض
_طب اعمل ايه يثبتلك أني معملتش عـ,ـلاقة مع حد ؟
=و ليه تعملي و تتعبي نفسك على الفاضي من الآخر كده انا نفسي اقتلك جداااا و هيحصل النهاردة عشان كده مشيت كل الرجالة عشان اعرف اخد راحتي وانا بقتلك
مسك الحزام قرب ومني وانا بعيط و بترجاه يسبني
رفع أيده ولسه هيضربني بيه ……. فجأة وقف رماه بعيد و قال
= انا مش قادر اضربك مش هاين عليا أمد ايدي عليكي لكن انتي هان عليكي تحملي من عشيقك هان عليكي أنك تخونيني عادي
=عايز اعرف انا لما عرفتك و اتجوزتك عملتلك ايه وحش عشان تنتقمي مني بالطريقة الزبالة دي !!!
=أبويا اللي وثق فيكي و اعتبرك زي بنته و كان بيقف ضدي دايما عشانك إنتي ، تخيلي لو عرف هيموت فيها
بدأ يعيط و يقول
=انا عرفت إنتي عملتي كده ليه عشان انا مكنتش اختيارك بس عندك حق انا جوزك على الورق بس مش أكتر
=لكن معندكيش حق او أي مبرر لخيانتك دي تعرفي لو جيتي قولتيلي أنك بتحبي واحد و عيزاه هو وانا لا كنت مش همنعك كنا اطلقنا و كل واحد راح عند اللي عايزه لكن إنتي اخترتي الخيانة !!!
_يا سليم والله انا مظلومة
=هههههههه إنتي مظلومة ؟!!!!
كفاية كذب عشان كل مرة لما بتتكلمي بتنزلي من نظري اكتر و أكتر
=بس بجد برافو عليكي عرفتي كويس أوي ازاي تكسريني انا مش عارف إنتي مستحملة نفسك ازاي ؟!!!!
=انا قرفان منك ومش طايق أبص في وشك انا مشوفتش حد بالرخص اللي إنتي فيه ده إنتي رخيصة أوي
مقدرتش استحمل الكلام اللي قاله في حقي كسرني و جرحني و اتعصبت جدا
و قبل ما يخرج من الشقة
_سليم
لف بصلي روحت فجاة ضربته بالقلم
_ده عشان تعرف تشك فيا كويس
ضربته تاني
_و ده عشان كل كلمة وحشة قولتها في حقي
ومسكته من القميص و زعقت فيه
_استحملتك كتير و استحملت و انت بتدوس عليا أكتر و أكتر فاكرني عشان مش برد عليك يبقى انا غلبانة وهسيبك تقول أي حاجة عني
لا أصحى كده انا بعرف اتكلم وبعرف ارد لكن مش عشان انا محترماك شوية يبقى تقول عني كلام محصلش
_طول ما انا عايشة و معملتش حاجة غلط هفضل اباجح فيك و هرد عليك كلمة بكلمة و كل ما تسألني هقولك محدش قربلي و إجابتي مش هتتغير عشان ترتاح هفضل ادافع عن نفسي و مش مهم أنك تصدق المهم ان انا متأكدة من نفسي ومش محتاجة اعمل أي حاجة عشان أثبت كل الكلام ده باطل
_و طالما انا مغلطتش هرفع وشي للسماء دايما و اتكلم بتكبر و فخر بنفسي و عمري ما هنزله للأرض او اتكسف من نفسي على حاجة
معملتهاش لما اغلط ابقى اتكلم عني بأي طريقة انت عايزها
_لكن قسما بالله أي كلمة وحشة تتقال عن شرفي هرد قصادها مليون و هوريك أيلين اللي انت ذات نفسك عمرك ما تعرفها
_و هحط عيني في عينك بدون أي خجل وبكل جرأة عشان انا عارفة نفسي كويس ابقى مين و لما اخونك هقولك مش هخاف منك على فكرة
اتعصب جدا و قالي
=مش خايفة اقتلك هنا حالا ً و مخليش مخلوق يعرف مكانك !!!!
روحت المطبخ و فتحت الدرج و أخدت أكبر سكينة و رجعت عنده و عطيته السكينة في أيده و خليتك ايده بالسكينة على رقبتي وقولتله
_ادبحني يلا اهو السكينة في أيدك يلا اقتلني
_انا مش خايفة من الموت عشان انا طبعا على حق و ربنا عالم بكده ف عادي اقتلني زي ما أنت عايز اهو انا واقفة قدامك
_عايزة أقولك كلمة قبل ما أموت خليك عارف بس ان انا عمري ما فكرت او هفكر اخونك او عيني تيجي على واحد تاني مهما كانت عـ,ـلاقتنا بعض خربانة قد ايه وانت بتكرهني لأنه مش معنى ان أهلي ماتوا وانا صغيرة يبقى
متربتش لو ملقتش حد يربيني
_يلا انا جاهزة أموت موتني يلا
نظراته كلها غضب ليا بس متكلمش و رمى السكينة بعيد و فتح الباب و قبل ما يخرج قالي
=أيا كان الكلام اللي قولتيه مش هصدقك ابدا و هتفضلي في نظري خاينة
رزع الباب وراه جامد و نزل و سمعت صوت عربيته اشتغلت بصيت من البلكونة لقيته مشي
زعلت جدا برضو مش راضي يصدقني بس مستسلمتش و متأكدة ان ربنا هينصرني و هيعرف أني مش خاينة
*من الجانب الآخر *
سليم مشي بعربيته و هو متعصب جدا و سرعة العربية عالية أوي و بيزعق
مع نفسه و بيقول
= ماشي يا أيلين ماشيييي انا هوريكي
=القلم اللي ضربتهولي ده هدفعك ثمنه كويس أوي و هخليكي تندمي على اللحظة اللي قررتي فيها تتحديني بالبجاحة دي
=جابت من فين كل الجرأة دي و عنيها مفيهاش ذرة خوف و لا كانت خايفة ابدا أني اقتلها
=مستحيل اصدق وحدة ممثلة و كذابة و خاينة زيها
=كان فين كل ده مستخبيلي يا ربي يوم ما أتجوز اروح أتجوز دي
=لا و واثقة من نفسها جداااا كأن نتيجة التحليل دي مشفتهاش ابدا !!!
=عملت اللي عليا وعرضتها على أتنين دكاترة وهم الإتنين قالوا انها حامل لكن هي بتنكر و بتكابر معايا كده ليييييييه ؟؟؟؟؟؟
=ماشي يا أيلين ماااشيييي
وهو بيسوق العربية زاد من السرعة أكتر
أما أنا حسيت بالذنب لأني تطاولت على سليم بالشكل ده و مع ذلك مرضيش يضربني ابدا ولا قربلي كان ممكن يضربني عادي جدا لكن هو معملش كده
فضلت أتمشى في الشقة من كتر القلقل و أبص على الساعة وصلت 1 الليل انا غلطانة كل مرة بخليه يتعصب بالشكل ده و يسيب البيت و يمشي و فضلت ارن عليه بس الظاهر حطني في القائمة المحظورة ????
انا لازم اتصرف افرض حصله حاجة لو قطاع طرق طلعوا عليه ……. فجأة افتكرت أن معايا رقم مرات صديقه قاسم قولت اتصل عليها و تخلي قاسم يشوفه راح فين و يهديه شوية
و بالفعل اتصلت عليها ،،،،،،، التليفون فضل يرن شوية و بعد كده ردت
_الو إزيك يا نور
“تمام الحمد لله وحشاني يا أيلين
_انتي أكتر ، بقولك هو أستاذ قاسم موجود ؟
” اه موجود
_طب ممكن تدهولي
” حاضر يا حبيبتى
“معاكي يا مدام
_استاذ قاسم هو سليم عندك ؟
” لا مش عندي
_طب ممكن تتصلي عليه شوفه فين ؟
“هو حصل حاجة ؟
_اه اتخانقنا جامد بس انا يعني اتخانقت عليه شوية بس هو أكيد زعل و مشي
“حاضر هشفهولك
_تمام شكرا
قفلت معاه …….. و فضلت الف في الشقة زي المجنونة
_انا غلطانة ايه قلة الأدب اللي بقيت فيها دي مهما كان هو أكبر مني بأربع سنين يبقى ازاي اتطاول عليه بالطريقة دي !!!
_بس برضو هو مستفز قال عليا شوية كلام خلوا اعصابي فلتت
_بس برضو انا غلطانة أيوة انا غلطانة يارب يرجع بخير
فجأة التليفون رن احسب قاسم عرف عنه حاجة لكن طلع رقم غريب بيتصل
قولت ارد و لما رديت كان صوت وحدة
*الوو مدام أيلين مصطفى محمد معايا ؟
_اه انا هي
*انا من مستشفى وسط البلد
_تمام والمطلوب ؟